പ്രക്ഷേപണം

               *
അടച്ചുറപ്പില്ലാത്ത 

മറ്റൊരു കൂട്ടിൽ

പക്ഷിസങ്കേതത്തിലെ 

വേനൽക്കാല പരിശീലകൻ

ഉറങ്ങിയെണീക്കുന്നതിനും മുന്നേ

പുറത്തുകടക്കണം
               *

സിഗരറ്റുകൾ

പാതിക്കുവെച്ചു വളച്ച്

അയാൾക്കു തട്ടിക്കൂട്ടാവുന്ന 

ഇടത്തരം പുകക്കുഴലുകൾ

ഇന്ന് ഒരു പക്ഷിയേയും

പുകയ്ക്കില്ല.
              *

ഇറച്ചി വാങ്ങാൻ 

വളർത്തുപക്ഷികളെ 

പറഞ്ഞയയ്ക്കുന്ന

നാട്ടിൽ നിന്ന്

ഒരു കപ്പു കാപ്പി

നിനക്ക് വരുത്തിത്തരാം.

എന്റെ കൂട്ടിൽ നിന്ന്

മുന്തിയ ഒരു പക്ഷിക്കൂട്ടത്തെ 

അടുക്കളയിലേക്ക് 

മലർത്തിയിട്ടുതരാം.
                *

പുറത്തുകടന്നേ പറ്റൂ എന്ന

നിർബന്ധത്തിനുമീതെ

ഒരു പക്ഷി

കാഷ്ഠിക്കുന്നു.
                *

ട്രെയ്നിംഗ് ക്ലാസ്സുകളിൽ 

കാട്ടുപക്ഷികളെ
മെരുക്കുന്ന നാലു മാർഗങ്ങൾ

ഇന്ന് പഠിപ്പിച്ചേക്കും.
               *

കമ്പിക്കൂടിനെ
കൃത്യമായി

ജയിലഴികളോട്

സാമ്യപ്പെടുത്തിയ
ഒരു പക്ഷിയോടൊപ്പം
മുൻകാല പ്രാബല്യത്തോടെ
ഒളിച്ചോടുന്നു.
               *